Luke 7

Aɓo Wowoyi Ngun Aba

1Sanu Yesu ɓei ku waʼazi zo zhin wa jeze lo Kafarnahum.

2Nsayi kwa soja bara ho dna nyasan yi sanwo, har ngye wo ɓa fi. Soja yi ɓo zhin kaptin nu. 3Sanu kaptin yi ɓei wo Yesu ɓo wa tnu a Yahudiyi atukwoda ge a yi Yesu ɓe cei. 4Ɓalo ɓa gyi wye ge Yesu wo ɓe wa bma zhin. Gama Kaptin yi ɓo zhin za manayi nu. Ɓa cige, Ngye oza lo woiye bmazhin, to zeye dudu lo. 5Gama wo ye a Yahudiyi sosai. Har ma wola aduwa nyakun mi yi.

6– 7– 8 ▼

▼The text of verses 6-Luk 7:8 has been merged.

Sai Yesu wa lo n ɓai, amma kafin ɓa si puwa yi, Kaptin yi wa je aza tnu ge woto ɓe mi puwa m, gama mito kun ce lo m. Da ɓo kurum emi ʼɓi kwa wo a kagna. Mi kpelo ntuge mi zhin za nu n wo dna na za sinta. Amma aza filo n mi sin-ta ce. N ma cige, lo sai ɓa lo. N ma cige ɓe, sai ɓa ɓe. N maci ema ɓara ge zhin deye, sai Ba zhin. Ntu cenu, daɓo kurum omi fyenu ɓa kagna.

9Yesu ɓo ku mamaki zhin. Wa cige mi to shin zagye n Israila mi n gaiciya ga ye pya yi m. 10Sanu Kaptin anugundo yi ɓei jeze ɓa gye fyenu yi la kagna.

11Esa fyewyi Yesu n wo abara yi alo Nain. Aza ɓa vi wo n mwa sosai. 12Ɓasi ezhi yi ai lo nzai o bi. Eɓi n wo ɓei fi nyi kwa owo ya toɓo ndohoi shan sun m. Aza viwo n mwa ɓai cibwi.

13Sanu n Yesu ɓei gye wo, wa wo wo sun-sun, wa ci wo ge, “to zhin bwi ci m.” 14Nsayi wa lo wa to zafi bwa, azafi layi ɓa ku kpe zhi. Yesu wa cige, “samari, wye-wyeyi ko jezebɓe da ho.”

15Eɓi yi wa laka sase woi daɓo n nazai n ɓa ɓei zhin ɓo nyi. Yesu kwa wa ga owo ya wo.

16Odna wo aza sosai. Har ɓa cige, “Anabi dnagmayi la e ya ba.” Yi ku Shekwoyi iko gye n naiye.

17Nabari yi kwa busi laɓa n Yahudiya har koi lo aknido.

Yesu N Yohanna Yi

18Yohanna abara kwa ɓaku aɓoye wo vinya n Yesu ɓei zhin nyi sanu n ɓa ɓo gna Yohanna aɓoye. 19Yohanna wa tnu aza ngun aba nge ɓa lo ɓa nya Yesu ge, “Oho nu zhin Masihu (Kristi) kwo kwa yi tu awye na bye a?”

20– 21– 22 ▼

▼The text of verses 20-Luk 7:22 has been merged.

Aza yi ɓei lo ɓa gye Yesu gni wo ka anyasan gna. Aza bmazhi, awyebua yi, woi knu alijenu ya njesun. Sanu n ɓa ɓei nya Yesu bo, wa ciɓa ge, “Fye lo fye gna Yohanna ʼɓo fye ku wo, fyei ku gye n naiye. Azabmazhi zan-zan lo daidai. Awyebuayi gye wyeba. A Kuturu da ɓai kagna sarai, atnubua-gunayi wo ɓeda lo sarai. A zafi la jeze ɓe. Aza nɓa to nyabwai kwa ɓaku nabari manayi wo. 23Fya ciwo ge anabarka tulo nza n woto fa mi gaiciya ga ɓo m.” 24Sanu n ɓa ɓei la kukala Yesu wa daɓo n Yohanna tukwo ge, “Fye ɓei lo fye gye nyikado nu n Yahudiya zhabuiʼa? Agbe-gbe n ose ci kwoi pmi ɓa laɓa? 25Fye ɓei gye wo n naje manayi kpe aje anakoi? Awo! Ai aza n ɓa dagma ɓa fi nsu puwa nu to ge n zhabui m. 26Amma fye ɓei gye anabi nu? I oza ndu anabi kwa. 27Littafi dwo nu ɓo sanu n kwa cige, ‘Miɓa tnu emi barayi n ma bye n nabai wa zhin zokwo gami.’ 28Shi anyi shi, zaho-zahoi to lo n du Yohanna m. Amma kwo oza n wo zhin Kmaknayi n ʼshe mi wo du Yohanna lo.” 29Aza n ɓaɓei wo Yohanna waʼazi kwa ɓa ku ye ge Shekwoyi ɓeda bmiya lo. A kuɓa zhin baptisma vinya. 30Aza n ɓa ɓei ce kurum ɓanu ɓei zhin a Farisiyi n amalami. Ɓato ɓei ye Shekwoyi zokwo m. Cenu ɓei zhin toɓa ye Yohanna waʼazi m.

31“Mi ɓa da gena n azaye pya tukwoʼa? Mi ɓa mwi ɓado n kni ya? 32Ɓa wu lo ngye aɓi nu kawai n ci aje ge ‘Ho ta ye amula wyefan lo m, ho ta ye azafi wyefan lo m.’ 33Gama Yohanna to ɓei zhin woi gyi nyagyi m. To woi sin ejem, amma fya ci ge ‘Ai wola cenya.’ 34Amma ma ɓe mi gyi nyagyi mi sin nya sisin. Fyei cige Wai zeye milo gyi, woi milo n sin, woi n na nugundo kasayi lo. 35Amma fye kpe ge nya fye danyi, koto lo-lo m.”

Nyagyi Gyi Ho Pya

36Farisiyi ho wa yi Yesu ge, wo ɓe wa gyi nyagyi n wo puwa. Yesu kwa to wa naɓo m. Sanu n ɓa ɓei sase ɓai gyi nyagyi. 37Nyikwozaho karuwa wawo ge Yesu dna lo ɓo. Wa ɓe n nyiknu dnagmayi shi n turare nufi. 38She wo ɓei lo dna n nyakun, wa ce ako-ko shi n Yesu aba woi cibwi. Owo awyenyi kayakpe n Yesu apita. Wa wun ya n wo tukwoyi. Wa zhin Yesu apita sunba wa ze turare ya kpe ɓa.

39Sanu n Farisiyi yi n wa yi Yesu nyi, ɓei gye lo nu. Wa gye karuwa n wo shi-shi lo nyi wa ci fi n wo bugba ge, “deye kwa wu pei-pei ge Yesu to zhin anabi nu m. Gama agnage Shekwoyi na tnuwo, wo kpe nyikwoza za ye pya ye n wo shi.”

40Nsayi Yesu wa dnawo tunani ɓe gbe ge, “Siman mi ei pma ma gna ho ɓoho.”

41“Oza ɓo nyi woi ga aza ta. Wa ga zaknayi ₦3,332. Waga zabayi ₦332. 42Amma aza ngun abayi to ɓai mi ɓa gba nyada owo agyiwye ye m. Ntuce nu waku gafara zhin ɓa. Ho gye lo ngye. Nyikanu ɓei gna agmada n ɓa miʼa?” 43Siman wa cige, “Mi gye lo ngye zayi nu n wo ɓei ce shi ₦3,332 nyi.” Yesu wa ciwo ge, “Ho kuda dai-dai.”

44Nsayi Yesu wa ci Siman ge, “Ho ku gye nyikoye n wo shin nyi, sanu ma, lodna n ho puwa ho to gami nuwan ge mi zhan apita m, amma wo la ɓa zhanya n wo awyenyi, har woi la ɓa wuya n wo tukwoyi. 45Ho to zhimi sunba m. Amma woku sunba zhin ma pita i tunyi sanu ma loɓe nyi. 46Ho to gami omi shin-shin yi m, amma wola turare nakwoyi zekpe ma pita. 47Ntuce nu owo alaifi nɓa mwa lo nyi, aku gafara zhin wo, gama wo ye milo n mwa. Amma oza nazhiwo gafara fyewyi owo yeye bwasun fyewyi nu ce.”

48Nsayi Yesu wa ci nyikwoyi ge, “Aku gafara zhin ho.” 49Aza nɓa ɓei kpe ɓai gyi nyagyi n woi nyi ɓa ci ge, “Zeye gye ge wozhin nyikado nu woi zhin aza gafara laɓa?”

50Amma Yesu wa ci nyikwoyi ge, “Oho gaiciya ga la ho gni, lo n lafiya yi.”